No på sundag, 21. mars, vert kyrkjemedlemmar i Høyanger kalla inn til soknemøte etter gudstenesta. På dagsorden står framtida til bedehuset i sentrum av tettstaden Høyanger. Det er ei sak som er særs viktig for kyrkjelyden, men også for alle andre som er opptekne av at Høyanger skal vere ein god stad å vakse opp og leve i for framtida.
For to år sidan var eg på visitas i Høyanger. Eg vart imponert over dei mange kvalitetane i denne kommunen, og ikkje minst av den vakre tettstaden i sentrum. Her ligg mykje til rette for å fremje fellesskap og trivsel, og i dette arbeidet vil kyrkja gjerne vere med. Utfordringa er at kyrkjelyden ikkje har dei tenlege lokala som er naudsynt for å skape dei gode tilboda som ein gjerne vil gje til innbyggjarane. Kyrkja i Høyanger ligg flott til og er godt egna til gudstenester og kyrkjelege handlingar, men ikkje til alt det andre arbeidet som kyrkjelyden gjerne vil drive. Det er her bedehuset kjem inn. Huset er godt egna til dette formålet, og ligg sentralt plassert.
Under visitasen i Høyanger fekk eg vitje bedehuset. Her fortalde ivrige medarbeidarar kva dette huset kan bety både for kyrkjelyden og det øvrige samfunnet i Høyanger framover. I mitt visitasføredrag frå 10. mars 2019, sa eg difor følgjande: «Eg vil takka kommunen for eit godt møte og en god samtale, for at de ser at kyrkja er viktig for lokalsamfunnet og at de ser at ein treng å prioritera vedlikehald og bygningar. Eg vonar at kyrkjelyden saman med kommunen óg kan sikre ein vidare drift i bedehuset i sentrum av Høyanger. Dette huset ligg sentralt og er ein viktig føresetnad for vidare satsing innan barne- og ungdomsarbeidet, undervisning, diakoni og anna fellesskapsbyggjande aktivitet.»
No er tida inne til å ta grep. No må kommunen og kyrkjelyden saman ta det løftet som her er naudsynt - gjerne saman med einskildpersonar og lag som er opptekne av framtida for folket på denne staden. Eg vonar at soknemøtet søndag kan bli eit positivt steg framover i prosessen med å sikre framtida til bedehuset i Høyanger.
Halvor Nordhaug
Biskop i Bjørgvin